Hebrews 10

Domwi Woiwoyi N kwokwoyi

1A Yahudiyi awyidna ɓei bmiya amma kwo ɓei zhin foto nu, kwo ɓei zhin ofun nu anya manayi n Kristi ɓei zhin ntu yi ɓo. A ɓei zhin a ga sadaka cici, eye dohodohoi. 2Sadaka yi ɓei gna ge kwo ɓa gni aza nu, to ai ɓei ga cici m. Kwo bmiya mwa-mwa ga yi wa ze gyigyiyi nyalo-nyalo, to wa zhin tunani laifi nya m.

3Amma sadaka to ɓei mi kwa nya ɓa tunani nukwoyi ya m, kwo ɓei zhin kwa pa ɓa a laifi ɓo nu cici. 4Kwo to ɓei zhan ɓa a laifi ya m. Anakwo ami, na ana miyi ta mi ɓa zhan za a laifi ya m, sai dai Yesu Kristi ami gmanyi.

5Ntu cenu Yesu wa ɓe anyi mi, Yesu ɓei da ɓo nu anabi ho aba wa ci ge, “Anyakpa ami ta siho ebemi — O Shekwoyi, ntu cenu hoi ga mi nayi ye, Emi nayi nu n ho ye sadaka. 6Sakada anyakpa nya to ga ho bugbafu m, kwo sadaka a pirist nya ɓata mi ɓaga ho bugba fu m.” 7N deye avun, fye gye, “Mi la ɓe ma ga mi wye-wyeyi ntu naza laifi ɓo. Nyanu n littafi ku da ntu mi ɓo.”

8She Kristi ɓei ku da ge, anyakpa ami ta mi kwa ga yi enya n Shekwoyi ye nyi m, njesun sadaka n na gyina ntu na laifi ɓo nyi ɓa ta fu wo bugbam, A Yahudaiyi awyidna ta dawo bugba m. 9Yesu wa je ɓo da n jesun wa gna, “Mi la ɓe ma ga mi wye-wyeyi, Mi ga kwo ntu n naza laifi ɓo nu. Ala zokwo kwo-kwoyi gaya. Ala ɓe n woi-woyi.” 10Shekwoyi wo ku gafara zhin yi n zokwo woi-woi. Wola ya laifi zhanya nyalo-nyalo. Yesu nu na zhin aɓo deye ntu yi ɓo, sanu wo ɓei fi ntu ya laifi ɓo nyi. 11Nsa kwokwoyi sa, pirist ɓei zhin wa laka gni n nabye fyegyi-fyegyi, wo ɓei zhin wa ga sadaka ntu naza laifi ɓo, ama kwo ta mi kwo gni za m. 12Ama Yesu ɓo ga wohin zun gmanyi ntu sadaka ɓo ga Shekwoyi, wa ga wo nayi ntu ya laifi ɓo. Wo tu lo naba duduyi vinya n iko yi n kun-sun Shekwoyi n shemi. 13Wo tu lo naba iko nya n kun-sun Shekwoyi yi, Owo anuwun yi ɓo fi n wo sunta. Enya nu n wo pmi, wo ɓei gyibe tu ʼɓa tukwo nyalo-nyalo. 14Wo ku yi ze aza gyi-gyi-yi n Shekwoyi aba. Owo ami layi alaifi zhanya har nyalo-nyalo.

15Zafun nu zhin yi seida n ge yi gyi-gyi-yilo. 16Zafun Shekwoyi nya gna ge, “Alkawali woi-woyi nyi nɓa zhin na Israila yi. Nɓa kami awyidna kpe nɓa bugba, nɓa ku awyidna ya fi ɓa n ɓami, deye ɓa zhin ɓa kpe mi nufi ye ɓa vi ma wyidna.” 17Wo ɓei je da ge, “Mi ku ɓa zhin gafara. Mi ta je ɓa laifi ɓo pa m, kwo kwa oɓa ɓonukwoyi zhin.”

18Mi ku fye zhin gafara, mi ku fye alaifi ze, amwi nyalo-nyalo, kwo zhin ɓo gboloyi nu fya ga sadaka ntu fya alaifi ɓo. Yesu ku deye zo zhin n wa mi yi. 19Emi azaje, yi ɓa mi ya lo Shekwoyi aba, Yesu ami la zokwo guya gayi. 20Yesu la zokwo woi-woyi guya gayi. Kwo zhin kwa ga wye-wyeyi, Wo la zokwo zhin yi kwoi lo Shekwoyi aba. Owo nayi ɓedo n wo ami yi nu ɓei zhin zokwo ye.

21She Yesu Kristi wo nu zhin Pirist Dnagmayi, woi gyi ɓe tu n Shekwoyi puwa nyi. 22Emi azaje, yi lo Shekwoyi aba n bugbayi guguyi ya. Yi ku gaiciya ga n ge wo ɓa gwo yi, ntu ge Yesu ami layi zhanya sarai. Zafun kwa woi zhan yi ya cici. 23Yi zhin aza gniyi nu kuma yi wyewyeyi lo. Yi to zhin shakka, n yi gnigni yi m, gama eyi Gni yi zhin za gaiciya da nu wohin kwa wo ɓa nu owo alkawali.

La Wye Ce N Bemanayi Zhin

24Yi zhin godiya ntu nya ɓo Yesu ku zhin gayi nyi. Yi yenajeyi, yi bma aje zhin yi ce aje bwa. Deye ɓa wu ge yi zhin Yesu abara nu hin-hin.

25Ema zaje yi to ci aduwa ɓo wyegba m, enya nu n na zaho zhin, amma yi ce aje bwa yi dna aje zokwo, Yesu jezeɓe ɓo kwo la wu viwyi.

26Yi to gyi abye fi n na laifi m, ntu ge yi kpe gaiciya ye lo. Amma n ya gyi abye n laifi zhin, Shekwoyi ta zhin yi gafara m, ya zhin yi gwo kpe m. 27Shekwoyi ɓa ta za nwa gyi abye n laifi zhin yi, Wo zhin Shekwoyi nuwun yi nu. Shekwoyi minagyi ɓo zopui nwo anuwun yi n nyipyeyi kmaknayi. 28Aɓei tu aza dole ɓa vi Musa awyidna, aza n ɓa ɓei zungna nyi ɓaɓei ku fi n tna sun-sungye. Sa n za ɓei zhin laifi, sai a bwa aseda da ngun aba kwo ngun ata laifi kwa tabbata. 29Aza ho lo ɓai kpe Shekwoyi ɓi apita, ɓai zhin aɓo ngye owo ami to ɓai gyi-gyi-yi m. Ɓa la Zafun Gyi-gyi-yi la minagyi ka. Oza n wo zhin aɓo deye pya, wo ɓa gwo tata dnagmayi, wo to ɓei lo Shekwoyi bemi m.

30Shekwoyi ɓei da ge, “Tagba kwo zhin mi nya nu. Nɓa ga ɓa amsa.” Nɓa ka aɓei da ya. “Nɓa da aza owa, nɓa ta aɓenukwoyi zhin yi.” 31Nkanu ɓa kpe Shekwoyi minagyi ɓo ye a? Kwo zhin ɓo dnawoyi nu oza lo Shekwoyi wada.

32Ho kpe sa lo n ho ɓo ya Yesu vi ncei yi? Emazaje, fye to ze wyihi amwi m. Anyipyeyi gmada nya n naɓo wowoyi: Fye ku wahala sin ntu Yesu eye ɓo, amma fyehin kwa fye, ku hakuri bwa. Fyeto na wo aɓo m amma fye vi wo cici. 33Mi pa salo naza ɓei zhin ɓai lu fye, ɓai ma fye san. Fye gye aza sun-sun nɓa ɓei zhin ɓai sin wahala n gye fye nyi, kwo zhin hali manayi nu. Shekwoyi kwa wo dagma lo n fyei. 34Fye ɓei sin wahala ɓedo n naza yi n ɓafi n kurkuku. Fye to ɓei damu sa n na ɓei ku fye akaya m, fye ɓo ku Shekwoyi kpeye har fyei kpema wo. Fye kpe lo ge, gyiba dnagmayi lo kwoi pmi fye nʼshemi.

35Fye to fa kpema Shekwoyi ɓo m, kwo n wuso-wuso, fye to fa m. Shekwoyi n lada yi shi fye lo n ʼshemi. 36Fye zhin peceiye, fya zhin hankuri. Deye fye zhin Shekwoyi ɓeye nu. N fya zhin Shekwoyi ɓeye, fye ɓei gwo lada n mwa. 37Sa fyewyi, Yesu jezeɓe lo, wo ta mwa sam. Fye zhin hankuri fya pmi wo. 38A Yesu viyi zhin Shekwoyi aɓi nu vinya, dole ya zan-zan dna n gaiciya ga. Nna ɓo vinya la kpema wo fyeto fa Dagayi vi ɓom, Shekwoyi ta wo agmada n nazai n ɓa jeze n navun yi m.

39Ama yi zhin wo aviyi nu ɓehin-hin nya. Yi to ye ya jeze navun yi m Eyi gaiciya ga kwo ci seda lo ge yi wye-wyeyi nyalo-nyalo nya yi lo.